شهادت مظهر جود، سخا،علم و معرفت، امام جواد(ع) تسليت باد

بیریسی ایستسه دنیا امورینه رونق

گرک امام جواده دخیل اولا مطلق

نقدر وار نفسون ایلمه حسینی قصور

توسّل ایت گله اجدادیوه سِنین و شهور

خدا محمّد و آل محمّدین قاپوسین

تانیتدوروب بیزه درد و بلا ایدنده وفور

بولاردی امّت مرحومه نین پناهگهی

دوشنده مشکله ایلر ائمّه حلّ امور

امیدیله گَلَنی ایلَمز بولار محروم

بولاردی باب کرم، هم شفیع یوم نشور

زمانه قویمیوب آل محمّدی راحت

ایدوبدی هر بیرینی بیر نفر شقی مقهور

تمام مُفتَرِضُ الطّاعه دور ائمّه ولی

اولوب امام محمّدتقی منه منظور

قالوردی بِش ایل ایکی یوز ایلی گِچه هجرت

اولوب زمان ولادت بو سروره مسطور

یازولّا نصف مهِ روزه، لیله ی جمعه

فنا جهانی ایشقیلاندوروب بو مطلع نور

سَمّیِّ ختم رسلدور، آدی محمّددور

تقیّ و هادی فاضل، جواددور مشهور

عرب ایچینده دیه للر بونا ابی جعفر

لقبده عالّم و مختار و منتخب مزبور

آتاسی حضرت موسی الرّضادی، شمس شموس

اونون یوزیندن ایدر کسب نور چرخینده خور

آناسی طیّبه ی مغربیّه، خلقتی پاک

مبارک آدی اونون خیزراندی، فطرتی حور

بیله یازوبدی مناقبده ابن شهر آشوب

ایدوبدی شیعه لری شادکام اول مبرور

حکیمه دختر موسی بن جعفر ایلر نقل

اونون روایتی خوشدور اگر اولا مذکور

خانم دیر منی احضار ایدوب بویوردی امام

باجی همین گئجه دونور حقّه وقت ظهور

مواظب اول، بو گئجه خیزرانی تک قویما

بو گئجه یوز ویره جاق غصّه لی قلوبه سرور

زنان قابله ایله منی سالوب بیر ایوه

چراغ قویدی او ایوده سراج حیّ شکور

او وقت اولوب که یتوب خیزرانه وقت قوا

چراغ گِچدی، بیز اولدوخ فسرده حال و حسور

طلوع ایدوب افق رحمیدن او دم خورشید

ایشیق گون اولدی به عِینه او لیله ی دیجور

منوّر ایلدی اول حجره نی جمال امام

چراغ اولمادی بِالمَرَّه اهل بیته ضَرور

باخاندا طشته نه گوردوم، او پاک مولودین

لباس تک بدنین پرده نور ایدوب مستور

آلوب قوجاقیمه ایتدیم کنار او پرده نی من

آتاسی داخل اولوب حُجریه زمان سحور

او نور دیده سینین آلدی گوزلرین اوپدی

مرتّب ایلدی گهواره، ویردی بیر دستور

سالوب بالاسینی گهواریه بویوردی منه

سنی باجی ایدورم حفظینه بونون مامور

او شمع باشینه پروانه تک دولاندیم من

او خدمت ایلدی ویرانه گوگلیمی معمور

ولادتین اوچومجی گونی آچوب گوزینی

صاقا صولا گویه باخدی امام هشتمه پور

فصیح صوتیله ایتدی شهادتینی اَدا

منی او امر عجب ایتدی خدمته معذور

امام محضرینه چوخ شتابیله گَلدیم

دیدیم قضیّه نی، فرمایش ایتدی ایتمه فتور

بالامدا چوخدی بو اعجاز و بو کرامتلر

مواظب اول گوره سن دُور ایلدوقجا دُهور

حکیمه قارداشینا اوغلینون دیور حالین

دیدوقجا یوز ویروری قلبینه نشاط و سرور

بونون شبیهی منیم بیر باجی سراغیم وار

بیان حالینه امّا واریمدی چوخ محذور

اوزی نشانه ی زهرادور، آدی زینب دور

زمانه نین گوزی گورموب ایله بلایه صبور

حسینه ایستور علیّ اصغرین دیسون حالین

ایدور ملال گلوگیر، اولموری مقدور

حیا ایده ایده، چوخ شرمیله خجالتیله

دیور حسین نجه بو حالته تحمّل اولور؟

علیّ اصغری گهواریه سالوبدی رباب

حجاز لحنی ایله باشلیوبدی شیون و شور

بالا سوسوزدان ایدوب غشّ، آنا یانور آغلور

نه واردی سودی نه سویا وار گمانی، باشه وورور

یاخوندی اصغری سوز عطش هلاک ایلسون

سودان کناره دوشن بیر بالیق کیمی چابالور

اوزین سالور یره گهواره دن آلاندا سسون

نجه بو حالی گوروم، کاش گوزلریم اولا کور

حسینی زینبی ایتمه حکیمیه تشبیه

اونیله واردی بونون فرقی چون کرور کرور

گنه امام محمّد تقینی سال یاده

اونیله حق سنی ایتسون جزا گونی محشور

تولّدیندن او گون که گیچوبدی دوقّوز ایل

آتاسی اُلدی یتیم اولدی، ایتدی حق ماجور

غریب آتاسینا یثربده جانشین اولدی

ولیک قویکادی مامون بی حیا و شرور

امامی ایستدی بغداده بی حیا مامون

اجابت ایلدی چون لاعلاجیدی مجبور

اولوبدی خطّه ی بغداده بی خبر داخل

اونون ورودینی بُلموبدی دشمن مغرور

گیدیردی بیر گونی مامون شکاره شوکتیله

نه گوردی جمعیدی اطفال شهر بیر جمهور

گورنده موکب مامونی قاچدیلار اطفال

چَکیلدی بیر طرفه دوردی لیک امام غیور

یتیشدی دوردی خلیفه، امامه باخدی دیدی

بیله وقاریوه دورماقیوه ندور منظور؟

منی گورنده فرار ایلدی تمام اطفال

توقّفونده نه نکته سنی ایدوبدی جسور؟

جواب ویردی مقصّر قاچار گورنده شهی

منیم خلیفه یانندا یوخومدی جرم و قصور

وسیعدور بو گذرگاه اَیُّهَا السُّلطان

فرار ایدردیم اگر تنگ اولدیدی راه عبور

گوروب فصاحتینی حیرته دوشوب مامون

آدین سوروشدی، بویوردی امام دل رنجور

آتامین آدی علیّ بن موسیِ کاظم

سمیّ ختم مآبم، امام وحش و طیور

شکارگاهه طرف یوز قویوب گیدوب مامون

بوراخدی اَل قوشوسین، گیتدی اولدی گوزدن دور

او قدر گیچمدی شهباز نازل اولدی یره

تلالوء ایلوری منقاری گوردولر چو بلور

شکاری خورداجا ماهیدی اُلمیوبدی هنوز

دوشوب تفکّره مامون او کان فسق و فجور

قویوب همان بالیقی آستینه رجعت ایدوب

گَلوب یتیشدی گذرگاهه خرّم و مسرور

گنه امام دایاندی، قاچوب تمام اطفال

دیدی خلیفه که ای سیّد اُناث و ذکور

نه وار منی دی گوروم ایمدی آستینیمده

جواب ویردی امام ای خلیفه ایتمه غرور

نجه یر اوسته اونون مثلی گویده دریا وار

بالیق، اولاردا ایدوب خلق خالقیم هر جور

کناره گاه اولاردان دوشر سلاطینون

شکار ایلر اونی شاهبازی چون عصفور

قویار همان بالیقی ینگینه خلیفه ی عصر

بیله بُلر بیزه مخفی علوم اولور مستور

اونیله حجّت برحقّی امتحان ایلر

که بلکه بُلمسون، اولسون بو خلق آرا منفور

امامی عزّتیله گَتدی مجلسه مامون

کلیم وارثی ایتدی او بزمی وادی طور

امامه اوز قیزینی ایستدی ایده تزویج

حسد اودیله دوتوب شعله، یاندی قوم کفور

آچوبلا طعن و تعرّض دلین منافقلر

دیوبله بو نه عملدور که سندن ایتدی ظهور

بیزه ندن ویروسن آل هاشمی ترجیح

بو خام فکر ندور قلبیوه ایدوبدی خطور

هنوز طفلیدی لازمدی علم ایده تحصیل

نه آنلوری بو ندور حکمِ مصحفیله زبور

ایشیتدی بو سوزی ویردی جواب او بی ایمان

بونا اوشاق دیوسوز سیزده یوخدی عقل و شعور

بولاردی عَیبَهُ العِلمِ خدا و معدن وحی

بولاردی مظهر آیات کردگار غفور

اینانموسوز سوزیمی سیزده امتحان ایلیون

گورون بِقَلبِهِ بَحرُ العُلوم، کَیفَ تَمور

او عصرین عالِمی یحیایِ ابن اَکثَمیدی

آدی او شهریده قاضیُ القضاتیدی مشهور

اونیله گَلدی همان بزمه سر به سر علما

اولار که واریدی اوز علمینه تمام فخور

سوال ایلدی مامون که سارقین اَلینی

کسلّه هاردان، او موضوعی ایلیون مذکور

بیری دیوب بیلگیندن، بیریسی مرفقدن

اولاره تابع اولوب اهل بزم بیر جمهور

امام عصر ایدوب ردّ او ایکی فتوانی

دیدی بو حکم خدادور اولونجا نفخه ی صور

قصاص سرقته دورت بارماقی گرک کَسیله

دیریلسه حکمیمی تصدیق ایلر اهل قبور

اَل اولماسا اونی ناقص نمازیده سجده

علاوه سارق اولانماز علاجینه مقدور

امام عصر اولوب غالب، اشقیا محکوم

خلیفه مُفتی بغدادیدن اولوبدی نفور

اوخوندی حجّت برحقّه عقد اُمُّ الفضل

یازیلدی محضر اشراف شهریده منشور

نه کاش اولیدی او ملعونه زوجه ی حضرت

نه ظلم ایدیدی امامه او نسل کلب عقور

سعدی زمان