(1)
نئجه آخماز گؤزومدن قان برادر
اولوب گول پیکرین الوان برادر
(2)
نئجه طاقت ائدیم چون قان آخوبدور
اولوب دریا کیمی میدان برادر
(3)
باجین تاب ائیلهمز کیم مه جمالون
اولوبدور یارهدن پنهان برادر
(4)
بو غملردن دلیم قانه دؤنوبدور
قالیب گول پیکرین عریان برادر
(5)
دوشوب بیر یانه بو صد پاره جسمین
اوخور گؤیده باشین قرآن برادر
(6)
سوسوز، ایستی قوم اوسته جسم پاکین
سنین تک اولمییوب مهمان برادر
(7)
دلیم، غم شعلهسی اودلاندیریبدیر
ائدیب قلبیم ائوین ویران برادر
(8)
بو غربت اؤلکهده اولدوخ عجب بیز
اسیر فرقهی عدوان برادر
(9)
ائدیب بو ظالمان بیمروّت
منی پابستهی حرمان برادر
(10)
آیاغه دور گؤزون آچ خیمهگاهین
نئجه گؤر ائتدیلر تالان برادر
(11)
گئنه بو ظلمیله سعد اوغلی کافر
بس ائتمیب، ائیلییب فرمان برادر:
(12)
هامی غمدن ولی بو غمدی فائق
کی سندن ائیلرم هجران برادر
(13)
دویونجا آغلاماق اولماز بو گونده
کی قویماز شمر بیایمان برادر
(14)
نئجه تاب ائیلییم آغلار سکینه
ائدر چوخ ناله و افغان برادر
(15)
ائدیبسن اولیای حقّی مأمور
کی تا محشر اولا گریان برادر
(16)
ائدیبلر حالینی «حالی» کی اولسون
بو غمدن طوطی نالان برادر