(بخش پایانی)
(( قورخماگلدیم!)) دئیه، سسلر ده منه جان دئدی قارداش،
منه جان –جان دئیه رک، دشمنه قان –قان دئدی قارداش.
(شهریار) سؤیله مه دن گاه منه سلطان دئدی قارداش
من ده جانیم چیغیریب: جان سنه قوربان دئدی قارداش
یاشا اوغلان سیزه داغ داش لی جئیران دئدی قارداش
ائل سیزه قافلان دئدی قارداش!
داغ سیزه اصلان دئدی قارداش!
داغلی حیدربابانین آرخاسی هریئرده داغ اولدو
داغا داغلار دایاغ اولدو.
آرازیم آینا –چیراغ قویمادا، آیدین شافاغ اولدو
او تایین نغمه سی قووزاندی، اوره کلر قولاغ اولدو
یئنه قارداش دئیه رک قاچمادا باشلار آیاغ اولدی،
قاچدیق، اوز لشدیک آرازدا، یئنه گؤزلر بولاغ اولدو
یئنه غملر قالاغ اولدو،
یئنه قارداش سایاغی سؤزلریمیز بیر سایاغ اولدو،
وصل اییین آلمادا ال چاتمادی، عشقیم داماغ اولدو،
هله لیک غم سارالارکن قارالار دؤندو آغ اولدو
آرازین سودگؤلو داشدی، قایالیقلار داباغ اولدو،
ساری سونبوللره زلف ایچره اوراقلار داراغ اولدو،
یونجالیقلار یئنه بیلدیرچینه یای –یلز یاتاغ اولدو،
گؤزده یاشلار چیراغ اولدو،
لاله بیتدی یاناغ اولدو،
غنچه گولدو، دوداغ اولدو،
نه سول اولدو، نه ساغ اولدو،
ائلیمی آرخامی گؤردوکده ظالیم اووچو قیصیلدی
سئل کیمی ظلمو باسیلدی، زینه آرخ اولدو کسیلدی،
گول گؤزوندن یاشی سیلدی.
تور قوران اووچو آتین قوومادا سیندی گئری قالدی،
اؤزو گئتدی، تورو قالدی
آمما حیدربابا دابیلدی کی بیز تک ها می داغلار
باغلانیب قول- قولا زنجیرده، بولودلار اودور آغلار،
نه بیلیم بلکه طبیعت اؤزو نامرده گون آغلار
اگری یوللاری آچارکن دوز اولان قوللاری باغلار،
صاف اولان سینه نی داغلار
داغلارین هرنه قوچو، ترلانی، جیرانی، مارالی
هامی دوشگون، هامی پوزغون، سینه لر داغلی، یارالی
گول آچان یئرده سارالی!
آمما ظن ائتمه کی داغلار یئنه قالخان اولاجاقدیر
محشر اولماقدادی داها وولقان اولاجاقدیر
ظلم دنیاسی یانار کن ده تیلیت قان اولاجاقدیر
وای.....! نه طوفان اولاجاقدیر!
دردیمیز سانماکی بیر تبریز و تهران دیر عزیزیم
یاکی بیز تورکه جهنم اولان ایران دیر عزیزیم
یوخ! بو، دین داعواسی دیر، دنیا تیلیت قان دیر عزیزیم
تورک اولا، فارس اولا، دوزلوک داها تالان دیر عزیزیم
بیز آتان دین دیر، آتان دا بیزی ایمان دیر عزیزیم
هر طرفده ن قیلیج ائندیرسه له قالجان دیر عزیزیم
بیر بیزیم درمانیمیز (موسی عمران) دیر عزیزیم
او، هامی دردلره درمان دیر عزیزیم
دوقتور اولدوقدا بشر بو یارانی ساغلاماق اولماز
اولماسا آللاه الی دین مرضین چاغلاماق اولماز
داغلاماق دا علاج اولسا، بیر ائلی داغلاماق اولماز
دینی آتمیش ائله یاوروم داها بئل باغلاماق اولماز
او گولوب آغلایا دا، اونلاگولوب آغلاماق اولماز
شیطانی یاغلاماق اولماز
دئدین: آذر ائلی نین بیر یارالی نیسگیلی یم من
نیسگیل اولسام داگولوم بیر ابدی سئوگیلی یم من
ائل منی آتسا دا اؤزگوللر یمین بولبولویم من
ائلیمین فارسیجا دا دردینی سؤیلر دیلی یم من
دینه دوغرو نه قارانلیق ایسه، ائل مشعلی یم من
ابدیت گولویم من
نیسگیل او چرچی یه قالسین کی، جواهر نه دی قانمیر،
مدنیت ده بین ائیلیر بدویت، بیر اوسانمیر،
گون گئدیر آزقالا باتسین، گئجه سیندن بیر اویانمیر،
بیر اؤز احوالینا یانمیر!
آتار انسانلیغی،آمما یالان انسابی آتانماز،
فتنه قووزانماسا بیرگون، گئجه آسئده یاتانماز،
باشی باسلاره قاتانماز!
آمما مندن ساری، سن آرخایین اول شانلی سهندیم،
ده لی جئیرانلی سهندیم
من داها عرش علاکؤلگه سی تک باشدا تاجیم وار،
الده فرعونه غنیم بیر آغاجیم وار
حرجیم یوخ، فرجیم وار.
من (علی) اوغلویام، آزاده لرین مردی، مرادی،
او، قارانلیقلارا مشعل،
او، ایشیقلیقلارا هادی
حَقّه، ایمانه منادی،
باشدا صینماز سپریم، الده کوتلمز قیلیجیم وار!