چهارشنبه, 13 شهریور 1392 ساعت 04:30
سهندیه(از مجموعه اشعار ترکی استاد شهریار)
(بخش 1)
شاه داغیم، چال پاپاغیم، ائل دایاغیم، شانلی سهندیم،
باشی طوفانلی سهندیم.
باشدا حیدر بابا تک قارلا- قیروولا قاریشیب سان،
سون ایپک تئللی بولود لارلاافقده ساریشیب سان
ساوا شارکن باریشیب سان
گؤیدن الهام آلالی سرّی سماواته دئیه رسن،
هله آغ کورلو بورون، یازدا یاشیل دون داگئیه رسن،
غورادان حالوا یئیه رسن.
او یاشیل تئللری، یئل هؤرمه ده آینالی سحرده،
عشوه لی ائشمه لرین وار
قوی یاغیش یاغسا دا یاغسین،
سئل اولوب آخسا دا آخسین،
یانلاریندادره لر وار.
قوی قلمقاشلارین اوچسون فره لرله، هامی باخسین،
باشلاریندا هئره لر وار
سیلدیریملار لار، سره لر وار
او، تک لرده نه قیزلاریاناغی لاله لرین وار،
قوزولار اوتلایاراق، نئی ده نه خوش ناله لرین وار،
آی کیمی هاله لرین وار.
گول- چیچکدن بزه ننده، نه گلینلرکیمی نازین،
یئل اسنده او سولاردانه ده رین راز- نیازین،
اوینایار گوللو قوتازین.
تیتره ییر ساز تئلی تک شاخه لرین چایدا –چمنده،
یئل او تئللرده گزنده، نه کور اوغلو چالی سازین،
اؤرده گین خلوت ائدیب گؤلده پری لرله چیمنده،
قول –قاناددان اوناآغ حؤله آچار غمزه لی قازین.
قیش گئده ر، قوی گله یازین.
هله نوروز گولو وار، قارچیچگین وار، گله جکلر،
یئل یاغیشدا یویونارکن ده گونش له گوله جکلر،
اوزلرین تئز سیله جکلر.
قیشدا کهلیک هوسی له چؤله قاچدیقدا جوانلار.
قارداقاققیلدا یاراق نازلی قلمقاشلارین اولسون!
یاز، او دؤشلرده ناهار منده سین آچدیقدا چوبانلار،
بوللو، سودلر سورولر، دادلی قاوؤتماشلارین اولسون!
آد آلیب سندن او شاعرکی، سن اوندان آد آلارسان،
اونا هر دادوئره سن، یوز او مقابل داد آلارسان،
تاری دان هرزاد آلارسان
آداش اولدوقدا، سن اونلا، داها آرتیق اوجالارسان،
باش اوجالدیقا دماوند داغیندان باج آلارسان
شئر الیندن تاج آلارسان!
او دا، شعرین، ادبین شاه داغی دیر، شانلی سهندی،
او دا، سن تک آتار اولدوز لا را شعری له، کمندی،
او دا، سیمرغ دن آلماقدادی فندی،
شعر یازانداقلمیندن باخاسان دور سپه لندی،
سانکی اولدوزلارالندی،
سؤز دئینده گؤره سن قاتدی گولر، پوسته نی، قندی،
یاشاسین شاعر افندی!
ُُاو نه شاعر، کی داغین وصفینه مصداق اونو گؤردوم،
من سنین تک اوجالیق مشقینه مشاق اونو گؤردوم،
عشقه، عشق اهلینه مشتاق اونو گؤردوم.
اؤ نه شاعر، کی خیال مرکبینه شو و شیغایاندا،
او نهنگ آت، آیاغین توزلو بولودلارداقویاندا،
لوله لنمکده دی یئرگؤی، نئجه طومار سارییاندا،
گؤره جکسن او زماندا:
نه زمان وارسا، مکان وارساکسیب بیچدی بیرآندا،
کئچه جکلر، گله جکلر، نه بویاندا –نه اویاندا،
نه بیلیم قالدی هایاندا؟
باخ! نه حرمت وار اونون اؤز دئمیشی توک پاپاغیندا
شهریارین تاجی اگمیش باشی دورموش قاباغیندا،
باشینا ساوریلان اینجی، چاریق اولموش آیاغیندا،
وحی دیر شعری، ملک لردی پیچیلدیر قولاغیندا.
آیه لردیر دوداغیندا.
او داداغلار کیمی شأنینده نه یازسام یاراشاندیر،
او دا ظالم قوپاران قارلا –کولک له دور شاندیر
قودوزون کورکونه، ظالیم بیره لرتک دارا شاندیر.
آمما وجهینده فقیر خلقی اگیلمیش سوروشاندیر
قار املتده هنر بولسا، هنر له آراشاندیر
قارالارلاقاریشاندیر،
ساریشاندیر!
گئجه حقین گؤزودور، طور تؤره تمیش اوجاغیندا،
اری ییب یاغ تک اوره کلردی یانیرلار چیراغیندا،
مئی، محبتدن ایچیب لاله بیتیبدیر یاناغیندا،
او بیر اوغلان کی، پری لر سو ایچرلر چانا غیندا،
اینجی قایناربولاغیندا،
طبعی بیر سئوگیلی بولبول کی، اوخور گول بوداغیندا
ساری سونبول قوجاغیندا،
سولار افسانه دی سؤیلر اونون افسونلی باغیندا،
سحرین چنلی چاغیندا.
شاعرین ذوقو، نه افسونلی، نه افسانه لی باغلار،
آی نه باغلار، کی « الف لیلی » ده افسانه ده باغلار.
اود یاخیب، داغلاری داغلار،
گول گولر سه بولاغ آغلار.
شاعرین عالمی اؤلمز، اونا عالمده زوال یوخ،
آرزولار اوردانه خاطرله یه امکاندی، محال یوخ،
باغ جنت کیمی اوردا « او حرام دیر، بو حلال » یوخ.
منتشرشده در
آنادیلیمده
آخرین‌ها از Super User
- درگذشت احياگر موسيقي «فلك» ، صفحه اول روزنامه اعتماد 1402/12/2
- بعثت شادابي حيات - صفحه اول روزنامه اعتماد 1402/11/18
- حضور در تئاتر لیلی و مجنون در تالار وحدت ؛ نمایشی از یعقوب صدیق جمالی
- عکس خوانی دکتر شعردوست (دیپلمات سابق و پژوهشگر آسیای میانه و قفقاز)
- بزرگداشت هشتادوچهارمین سالگرد تولد استاد ساوالان
