یکشنبه, 06 بهمن 1392 ساعت 03:30
«تورکون دیلی» (از مجموعه اشعار ترکی استاد شهریار)
تورکون دیلی سئوگیلی، ایستکلی دیل اولماز
اؤزگه دیله قاتسان، بو اصیل دیل، اصیل اولماز
اؤز شعرینی فارسا، عربه قااتماسا شاعر
شعری اوخویانلار، ائشیده نلر کسیل اولماز
فارس شاعری چوخ سؤزلرینی بیزدن آپارمیش
(صابر) کیمی بیر سفره لی شاعر، پخیل اولماز
تورکون مثلی، فولکلورو دنیادا تک دیر
خان یورقانی، کند ایچره مثل دیر، میتیل اولماز
آذر قوشونو، قیصر رومی اسیر ائتمیش
کسری سؤزودور بیر بئله تاریخ ناغیل اولماز
پیشمیش کیمی، شعرین ده گرگ داد –دوزو اولسون
کند اهلی بیلرلرکی، دوشابسیز خشیل اولماز
سؤزلر ده جواهر کیمی دیر، اصلی بدلدن
تشخیص وئره ن اولسا بوقده ر زیر- زیبیل اولماز
شاعر اولا بیلمزسن، آنان دوغماسا شاعر
میس سن، آبالام، هر ساری کؤینک قیزیل اولماز
چوخ قیصا بوی اولسان اولوسان جن کیمی شیطان
چوخ دا اوزون اولما کی اوزوندا عقیل اولماز
مندن ده نه ظالیم چیخار، اوغلوم؛ نه قصاص چی
بیر دفعه بونی قان کی ایپکدن قزیل اولماز
آزاد قوی اوغول عشقی طبیعت ده بگه نسین
داغ- داشدا دوغولموش ده لی جئیران حمیل اولماز
انسان اودی توتسون بو ذلیل خلقین الیندن
آللاهی سئوره سن، بئله انسان ذلیل اولماز
چوخ داکی سرابین سویو، وار یاغ- بالی واردیر
باش عرشه ده چاتدیرسا، سراب اردبیل اولماز
بیر ذره مساوات اولا، شاعر چؤپه دؤنمز
اربابلاریمیزدان دا قارینلار طبیل اولماز
دوز واختدا دولار تاختا –طاباق ادویه ایله
اوندا کی ننه م سانجیلانار زنجفیل اولماز
بو (شهریار) ین طبعی کیمی چیممه لی چشمه
کوثر اولا بیلسه دئمیرم، سلسبیل اولماز
منتشرشده در
آنادیلیمده
آخرین‌ها از Super User
- درگذشت احياگر موسيقي «فلك» ، صفحه اول روزنامه اعتماد 1402/12/2
- بعثت شادابي حيات - صفحه اول روزنامه اعتماد 1402/11/18
- حضور در تئاتر لیلی و مجنون در تالار وحدت ؛ نمایشی از یعقوب صدیق جمالی
- عکس خوانی دکتر شعردوست (دیپلمات سابق و پژوهشگر آسیای میانه و قفقاز)
- بزرگداشت هشتادوچهارمین سالگرد تولد استاد ساوالان
