سه شنبه, 01 بهمن 1392 ساعت 03:30
«یالان دنیا» (از مجموعه اشعار ترکی استاد شهریار)
سنین بهره ن یئین کیم دیر؟
کیمینکی سن یییه ن کیم دیر؟
سنه دوغرو دئین کیم دیر؟
«یالان دنیا، یالان دنیا»
سنی فرزانه لر آتدی،
قاپیب، دیوانه لر توتدی،
کیمی آلدی، کیمی ساتدی،
ساتان دنیا، آلان دنیا
سنی بایقوشلار آلقیشلار،
ده لی، ویرانه نی خوشلار،
دولان عقله، سنی بوشلار
ایچی، بوشلار دولان دنیا
چاتیب سندن کؤچن کئچدی
اجل جامین ایچن کئچدی
اولان اولدو، کئچن کئچدی
نه ایستیردین اولان دنیا!؟
آتی ازل داغا سالدیق،
یورولدوقجا، دالی قالدین،
آتی ساتدیق، اولاغ آلدیق
بَهَر اولدو، پالان دنیا
سنه قارونلار آللاندی،
قیزیلدان تللی قاللاندی،
باتیب ظلماته قویلاندی،
اولوب تللی تالان دنیا
قازانیب، هئی تالانیب سان،
قالانیب هئی جالانیب سان،
ازلدن چالخالانیب سان،
یئنه ده چالخالان دنیا!
ننه قارنی، ایلک بئشیگین
قبرستانلیق، صون دئشیگین
نه ایچه رین، نه ائشیگین
قارانلیق بیر دالان دنیا
نه قاندین، کیم گول اکن دیر؟
کیم قلیج تک قان تؤکن دیر؟
(تیمور) هله کوره کن دیر،
(چنگیز) جانین، آلان دنیا
ایگیت لرین باشین یئیه ن،
قوجالار بوز باشین یئیه ن،
قبیرلرین داشین یئیه ن،
اؤزو یئنه قالان دنیا!
بیری آینا، بیری پاس دیر
بیری آیدین، بیری کاس دیر،
گئجه طوی دور، سحر یاس دیر
گول آچدیقدا، صولان دنیا
بوغولایدین دوغان بئرده
دوغوب خلقی بوغان یئرده
اوغول نعشین اوغان یئرده
آنا زولفون یولان دنیا
اوجاق ایکن سؤنه یمیش سن،
چاناق ایکن چؤنه یمیش سن،
نه پیس قاری ننه یمیش سن،
ناغیل! یالان! یالان دنیا.
یامان قورقو! ییغیلایدین!
طوفانلاردا بوغولایدین!
نولایدی بیر داغیلایدین،
بیزی درده سالان دنیا
منتشرشده در
آنادیلیمده
آخرین‌ها از Super User
- درگذشت احياگر موسيقي «فلك» ، صفحه اول روزنامه اعتماد 1402/12/2
- بعثت شادابي حيات - صفحه اول روزنامه اعتماد 1402/11/18
- حضور در تئاتر لیلی و مجنون در تالار وحدت ؛ نمایشی از یعقوب صدیق جمالی
- عکس خوانی دکتر شعردوست (دیپلمات سابق و پژوهشگر آسیای میانه و قفقاز)
- بزرگداشت هشتادوچهارمین سالگرد تولد استاد ساوالان
