شهادت حضرت امام موسی کاظم تسلیت باد

 ئولورم  تنگه دوشوب روح و روانیم آنا گل

یغشوب  سینمه  ایستور  چیخا  جانیم آنا گل

دئمورم منله  گلوب  سجن محنده اولاسان

دئمورم  پیک  اجل  داده  گلنده  اولاسان

دیـورم  باشیم  اوستنـده  ئولنـده  اولاسان

گورم اوّل سنی اوندان چیخا جانیم آنا گل

آخرین دم باخا یورقون گوزوم آغلارگوزوه

قـولاقیم  سامع  اولا   سن  دانشـانـدا  سوزوه

گورسدیم  قمچیلرین  ردّینی  بیـر بیر  اوزوه

چوخ  یوبانما  قوتاروب تاب  و توانیم آنا گل

قوری یرده دونورم صاق صولا جان اوسته اوزوم

ولی  دوندوقجه گوزتلور  در  زنـدانی گوزوم

ئوزوجودیم کیمی زندانی اولوب دلده سوزوم

دیـه  بلمـور  سـوزومی  اوتلـی   زبانیم آنا گل

آدوی  ورد  ایلیوب  راز و  نیاز ایلیورم

در امیدی  بو  پاک  آدیله  باز  ایلیورم

گر چه  پیرم  گنه  احساس  نیاز ایلیورم

سسلنور جسمیده یورقون ضربانیم آنا گل

حبسیده پیکریم آزقالدی که جاندان دوشسون

یورولوب مرغک روحیم طیراندان دوشسون

شریانیمده  کی  قانیم  جـریاندان  دوشسون

هله  شـریانیده   سیرینـده دی  قانیم آنا گل

بـو قرانلوقـدا  نـه احوالیمی دل اهلی بلور

نگران گوزلریمون اشگینی بیر کیمسه سیلور

نفسیم  تنگه  دوشوب  گاه  گلور گه کسیلور

قصدون اولسا گله سن آزدی زمانیم آنا گل

سن که  یاده  سالوسان  غربیـده  بیگانه لری

روحون  آواره  گزور  شرقیـده  ویرانه لری

آدوی یوزده یازوب گوزیاشیمون دانه لری

من سنون   ئوز  بالوام  دلـده فغانیم آنا گل

نگرانم اودی که ترک ایلمور جسمیمی جان

اینجدور ئوز نفسیم  روحیمی چیخمور آسان

رو بـه قبلـه  ایلیـن  وار نـه  الیمـدن یاپشان

واردی نه قاری ، نه ده فاتحه خوانیم آنا گل

چوخ  ائلیم  واردی  وار  آغلیانیم کیم اولاجاق

گوروب  احوالیمی  دل داغلیانیم کیم اولاجاق

جان  چخاندا  گوزومی  باغلیانیم  کیم اولاجاق

سنه  چاتدی گنه  جان  اوسته گمانیم آنا گل

من  او  ماهم باتورام تاپمورام اولدوزلاریمی

قویمشام   گوزلری  یوللاردا  آدامسیزلاریمی

سالمورام  یادیمـه  حتی  نگـران  قیزلاریمی

انتظـارم   سنـه  آی  نـام  و  نشانیـم آنا گل

او قـدر  آغلامیشـام  غم  قاریشوبدور  قانما

قصـد لله ائـله جان اوستـه نـنه گـل  یانما

نجه گور رخنه ایدوب رنج رطوبت جانیما

سالدی  دلدن  بو  رطوبتلی مکانیم آناگل

اثری از هادی اردبیلی